'அட்டு' படத்தின் மூலம் அனைவராலும் அறியப்பட்டவர் இயக்குநர் ரத்தன் லிங்கா. இவர் தற்போது 'லாக்' என்ற படத்தை இயக்கியுள்ளார். பாம்பூ ட்ரீஸ் சினிமாஸ், RPG ராயல் பினோபென் குழு, சக்திவேல் பிக்சர்ஸ், ஆகிய நிறுவனங்கள் இணைந்து 'லாக்' திரைப்படத்தைப் பெரும் பொருட்செலவில் தயாரித்துள்ளன.
நாம் பழகும் மனிதர்கள் நல்லவர்களா: இந்த உலகில் வாழும் ஒவ்வொரு மனிதருக்கும் ஒரு கனவு உண்டு. அதை நோக்கிய பயணத்தையே அவர்கள் வாழ்க்கையாக வாழ்கிறார்கள். சிலருக்கு அந்தக் கனவுகள் பலிக்கின்றன. சிலருக்கு பாதிதான் நிறைவேறுகின்றன. சிலருக்குக் கனவுகள் தொடக்கத்திலேயே கருகிப் போய் விடுகின்றன.
இந்த சமுதாயத்தில் நாம் பழகும் மனிதர்கள் நல்லவர்களா? கெட்டவர்களா? என்பதை நாம்தான் கண்டறிய வேண்டும். ஏனெனில் இந்த உலகில் நம்மை நாம்தான் காப்பாற்றிக் கொள்ள முடியும். இல்லாவிட்டால் அதற்குண்டான விளைவுகளை நாம் அனுபவித்தே தீர வேண்டும். இதுவே 'லாக் ' படத்தின் கரு.
சமூக விரோதிகளும் தீயசக்திகளும் மனிதர்களின் கனவில் கனலை மூட்டி விடுகிறார்கள். கனவு பூவாக மலரும் முன்பே மிதித்துச் சிதைத்து விடுகிறார்கள். அந்த நகரத்தில் சைக்கோ காமக் கொடூர கொலைகாரர்கள் ஐந்து பேர் ஊடுருவுகிறார்கள். அடுத்து தங்கள் காமப்பசிக்காக ஜூலி மீது கண் வைக்கிறார்கள்.
மிருகங்களின் கொடூர கரங்களிலிருந்து எப்படி ஜூலி தப்பிக்கிறாள்? சைக்கோ கொலையாளிகள் என்ன ஆனார்கள்? என்பதைப் பரபரப்பாக சொல்லும் படம்தான் லாக். அடுத்தடுத்து முடிச்சுகள், திருப்பங்கள் எனக் கதை நகர்கிறது. இப்படி ஹாலிவுட் தரத்தில் வித்தியாசமான சைக்கோ த்ரில்லர் படமாக லாக் உருவாகியுள்ளது.
ஹாலிவுட் தரத்தில் சைக்கோ படம்
இப்படத்தில் நாயகனாக சுதிர், நாயகியாக மது நடிக்க, இரண்டாவது நாயகியாக ஹரிணி நடிக்கிறார். இவர்கள் தவிர நடன இயக்குநர் பாரதி, சீனிவாச வரதன் ஆகியோரும் நடித்திருக்கிறார்கள். இப்படத்தை இயக்கியிருக்கும் ரத்தன் லிங்கா ஏற்கெனவே 'அட்டு' என்ற படத்தை இயக்கி,அதன் மூலம் பரவலான கவனத்தைப் பெற்றவர்.
ஒளிப்பதிவு - நந்தா, இசை - விக்ரம் செல்வா, எடிட்டிங் - மகேந்திரன் கணேசன் ஒரு முழுநீள விறுவிறுப்பான சைக்கோ த்ரில்லராகவும் படம் பார்க்கும் ரசிகர்களை இருக்கை நுனியில் லாக் செய்து விடும் அளவுக்குத் திகிலும் திருப்பங்களும் கொண்ட படமாகவும் 'லாக்' உருவாகியிருக்கிறது. இப்படத்தின் பஸ்ட் லுக் போஸ்டர் இன்று (மார்ச் 27) வெளியாகி பெரும் பரபரப்பை ஏற்படுத்தி உள்ளது. மேலும் 'லாக்' படத்தின் பர்ஸ்ட் லுக்கை பலரும் பாராட்டி வருகின்றனர்.
இதையும் படிங்க: ஆர்ஆர்ஆர் முதல் நாளில் ரூ.223 கோடி வசூல்!
